<面試實錄 - 地勤> 之前有個 Friend 同我講笑，你見過咁多份工，大可以出書講下唔同工既面試實錄！哈哈！出書無可能架喇，不過，見身邊突然多左好多 Friend 問我地勤見工既野，好啦，出地勤既面試實錄啦！ 首先比D背景資料大家先：以香港作為基地，知名o既兩間航空公司(Cathay Pacific，Dragonair)，都有自己o既地勤服務。有啲外國航空公司，都會喺香港自己聘請地勤。不過，有啲唔會自己請，反而選擇為香港國際機場提供地勤服務o既公司(Jardine，Menzies)。佢哋會為呢啲外國國際航空公司聘請地勤，為佢哋服務。 每間航空公司，對地勤o既入職要求都係差不多。主要都係︰ 1. 中五畢業 (會考合格) 2. 中、英文良好，能操普通話 (懂得外國語言為佳) 3. 有客戶服務經驗為佳 4. 有良好溝通能力 其實，只要有以上o既基本條件，都可以申請。難唔難？好視乎自己o既面試表現。幾時有空缺？可以去不同o既航空公司網頁瀏覽。基本上，大部份航空公司o既地勤空缺，都不斷請人。因為流失率高嘛！如果，真係想試，最好做哂準備先去。咁樣就可以放胆面試，表現都可以好啲嘛！ 講返自己先，返 Ngong Ping 360 個時，聽一個之前做地勤同事講話會請 Part-time。於是，就上咗幾間提供地勤服務o既公司網站，睇下有冇空缺。 咁就梗係有空缺啦，仲要間間都有喎 ！(聽聞呢份工流失率奇高，所以長期空缺) 但就無講話有 Part-time，但我都 sent resume 去 Jardine 試下喇！ 我等咗個兩日就收到 call，但佢就話呢段時間唔請 Part-time，不過見就黎畢業又想係 Airlines 度做野，咁我就試下啦！ 4月2日 FIRST & SECOND INTERVIEW 呢日，我上午十點就去 intervew！ 其實，我去 in 之前真係冇咩期望，因為以前都無諗過做地勤，試下就算啦。 去到 first in，係見 HR！HR 同事會 based on resume 問一啲問題。而成個過程係咁： Interviewer 先介紹自己，同呢個 interview 大概程序。跟住就會開始用英文問下問題。當然，你要用英文回答啦！問題大概都係問：介紹下你宜家份工、可唔可以講下點解要應徵呢份工、讀書 D 野、等等…… 之後，interviewer 就會俾一篇中文廣播，要你用普通話讀出呢篇廣播、另外，通常都會叫你用普通話介紹一個地方。最後，interviewer 就會用返廣東話問問題。例如：你知唔知呢份工o既工作係咩、你知唔知呢份工返 shift、你平時返朝九晚五，你會唔會唔慣、呢份工要長時間工作，好辛苦喎，你得唔得、你仲有冇其他問題想問、等等…… 其實，問題都好簡單。我唔會同你講話咩放鬆啲，唔好緊張。因為當時我自己都緊張到死！(不過，記住一定要笑 ) 如果你得咗的話，interviewer 就會叫你出去等做 second in喇！ 嚟到 second in，梗係希望自己 pass 埋，去 final 啦！而 second in o既過程，都好簡單，不過我都係好緊張。 Second in o既 interviewer 有 D 惡，不過佢首先會同你傾陣計先，等你放鬆啲。然後，佢會解釋呢個 interview 會做啲咩，等你準備好，就會開始。呢 part o既 interview，主要係做 role play (廣東話o架)！Interviewer 會俾一啲作為地勤喺機場會遇到o既問題，要透過 role play 作答。Interviewer 就係 passenger，而你就梗係地勤啦！唔駛驚喎！佢啲問題可能對未做過 Customer Services o既人嚟講會好難，但係佢冇規則o架！即係話，所有答案可以自由發揮，唔需要顧及任何安全條例。不過，有樣嘢好重要。就係一定要笑，一定要保持良好態度同禮貌。雖然，佢會一直為難你，或者黑面。但係，千祈唔好咁快放棄，然後話搵 supervisor 幫佢。因為咁樣，只會令佢覺得你冇 guts 去面對佢。所以放胆啲，咩都唔好怕。做完 role play 之後，佢都會用返廣東話同你傾計。佢啲問題，其實同 first in o既差唔多，可能只有字眼上o既分別。 呢一 part，我可以俾o既 tips ，就係要笑，要有良好態度，要堅持到底。唔識拆唔緊要。你可以換個角度諗下，如果你係個客，你遇到呢個問題，你希望地勤人員點樣答你，想佢點幫你。記住，你離開崗位，都係一個客，所以用心去答就得。 完咗之後，佢會叫你返去等消息。如果你得o既，幾日內就會通知你 (我係4月4日收到 final in call)，相反，一個星期左右會收到 reject email！ 4月8日 FINAL INTERVIEW 4月4日收到 call，約咗4月8日做 final in！得四日時間，份工又唔係話在乎 (好寸 tim) ，所以我都無做特別準備！但係我會建議大家做足準備，睇啲 interview o既書，上間公司o既 website 睇下公司資料，上有關地勤 interview o既討論區睇料，另外自己就諗返下 first & second in 時問過o既問題，試下答多次，準備更好o既答案咁囉！ 到 interview，2 個 interviewer (地勤高層嚟o架，分別黎自 Landside & Airside！) 都係同你傾下計，based on resume 問下你問題。全程都用廣東話o架！我自己 in 嗰陣o既問題，同 1st & 2nd in o既問題差唔多。 記住，每一次 interview，interviewer 都會問你有冇問題。唔好答冇，點都要搵啲問題嚟問下。而呢啲問題，最好就係有關工作性質，promotiom o既問題。因為咁樣，佢先會覺得你係有誠意想做，同埋係想喺度有長遠發展。都講過啦，呢份工流失率高嘛！記住啦！ 之後，HR 同事就會帶得咗o既同事入房，講下你得到o既 offer，俾個地址你做 body check，同埋俾個時間你返嚟做 permit 同 sign contract！最後，梗係俾埋 training ( Training 要8個 weeks )時間你啦！係 Training 個時就會分配去 Landside or Airside！ 成個過程講哂喇！如果真係諗住 in o既朋友仔，要俾心機呀！希望幫到你哋啦！ | 
